GEGURITAN PANAH PASUPATI sane kagurit olih I G.N.Agung Sandy Warman, S.Pd.H

Geguritan panah pasupati

 

PUPUH SINOM

1. PINIH AJENG LAN ATURANG

Inggih Ida Dane pamiarsa, sane kapertama ngiring ja mengaturang

2. RASA BHAKTI RING HYANG WIDHI

Paricihna astiti bhakti sane sujati majeng ring Ida Hyang Widhi Wasa

3. PAMEKAS RING SANG HYANG SASTRA

Pinih utama sane kahaturan bhakti nenten ja wenten tios majeng ring sunar Ida sane meparagayang Sang Hyang Sastra

4. MAKA DEWA MARING AJI

Napi sane mawinan asapunika?, duaning Ida wantah dewaning kaweruhan

5.AJI SASTRA SANE SUCI

Ida wantah pinaka Dewa ring sehananin Aji Sastra sane mautama

6.SADURUNG TITIANG MENGATUR

Inggih..inggih,, sadurung titiyang ngelanturang atur

7.CRITA NE SAMPUN KALOKTAH

Mengaturang uningayang inggian carita sane sampun kasub kasumbung, pamekasne ring umat hindu ring jagat Bali puniki

8.CRITA PANAH PASUPATI

Inggih punika indik carita PANAH PASUPATI

9.NGIRING DUMUN

10.NGATURANG PANGASTUNG KARA

Pinaka pemungkah titiang ngaturang gegitan puniki, ngiring cakupang kara kalih mengaturang pangastung kara, "Om Swastyastu".

PUPUH SINOM

1.NE MANGKIN LANTUR CRITAYANG

Inggih… ring galahe puniki jaga lantur uningayang titiang indik geguritan puniki

2.WENTEN DAITYA SANE SAKTI

Duk rahina sane sampun lintang kocap wenten sang merage raksasa sane sakti pisan

3.TEN PRESIDA KE KASORANG

Sangkaning saktin iraksasa punika ngelangkung, punika mawinan iraksasa ten presida kekasorang

4.OLIH DEWA SANE SIDI

Sehananin para dewata ne sane sakti-sakti nenten presida nandingin iraksasa

5.WYADIN MANUSA NE SAKTI

Sapunika taler, yadiastun wenten wong manusa sane kasengguhang mawisesa, nenten presida ngasorang iraksasa

6.SETATA NGERUSAK IPUN

Punika sane mahawinan sang sane maraga daitya punika mesolah ngulah laku,metingkah setata ngerusak

7.SANE WENTEN MARING JAGAT

Sami sane wenten ring jagat tiga ne puniki ke usak-asik olih iraksasa

8.TUR SAMI SANE MAURIP

Turmaning sehananin sane maurip, kesengsarain, kepademang olih iraksasa

9.WASTAN IPUN

10.WANTAH NIWATAKAWACA

Inggih..inggih munggwing wastan iraksasa punika wantah niwatakawaca

 

 

PUPUH GINADA

1. I RAKSASA NGAWI NAYA
   Kacarita raris I raksasa sane mewasta niwatakawaca punika, ngrincikang naya wiweka sane singid
2. NGEBUG JAGAT MARING SWARGI
   Munggwing naya sandi sane kabuatang wantah pacang ngusak asik mayuda maring para dewatane sane wenten ring swargi
3. NGELAWAN PARA DEWATA
   Sane pinaka meseh iraksasa ring swargi inggih punika para dewa sami
4. NGANGGE RAGA ANDEL TEGUH
   Sane kaangge mayuda taler sane kapiandelang olih iraksasa ring payudan nenten ja wenten tios wantah anggannyane sane kalintang teguh-teguh punika.
5. AJERIH NENTEN KERASA
   Dwaning sampun kapiandel ring ragannyane teguh miwah sakti, punika mawinan iraksasa nenten ngerasayang ajerih yadiastun akidik
6. NAPI MALIH
7. SANE PACANG KEJEJEHANG
   Duaning asapunika buat kawisesan iraksasa niwatakawaca punika, mawastu nenten wenten sane pacang katakutin malih.
   
   PUPUH GINADA
   
    
8. NENTEN MALIH KAUCAPANG
   Inggih para pamiarsa, nenten lantur uningayang titiang malih
9. IRAKSASA MARING MARGI
   Munggwing sepemargan I raksasa sane pacang nyujur swargi
10. KEWENTENANG JAGAT SWARGA
    Sane mangkin caritayang titiang indik kawentenan ring swargi ri tepengan punika.
11. SAWIREH JAGA KAGEBUG
    Seantukan jagat swargi pinaka linggih para dewata pacang kajarah, kaperangin olih I satru
12. OLIH SANG MERAGA DAITYA
    Sang meperaga satru sane pacang ngebug jagat swargi wantah para raksasa
13. MENGAWININ
14. PARA DEWATA SIAGA
    Inggih…kawentenan byutane kadi punika, ngawesanayang para dewa ne sami sayaga pacang nyanggra pariindike punika.
    
     
    
    PUPUH SEMARANDANA
    
15. MANGKIN NATHA ING SWARGI
    Sane mangkin aturang titiang kewentenan sang pangwasa jagat swarga
16. PINAKA RAJA DEWATA
    Ida maperagayang natha, kapiraja olih para dewata sane wenten ring jagat swargi sane mautama
17. PANGWASA PARA DEDARI
    Wenten taler meraga widyadara miwah widyadari sane kakuasa olih ida
18. MAPUSPATA SANG HYANG INDRA
    Ida sang maraga prabu ring swarga mapuspata inggih punika Sang Hyang Indra
19. SAMPUN NGERASA TAN SIDA
    Kawyaktian ida sang hyang indra, mepekahyunan nenten presida antuk ida ngabuatang, napi ke punika ?
20. NGASORANG MERAGA SATRU
    Sane nenten presida antuk ida, wantah ida nenten sumanggup pacang ngasorang sang meraga musuh sane marupa raksasa punika
21. NGAWE SUNGSUT KAHYUN IDA
    Pariindikan ida nenten presida melanin jagat, mehawinan metu sedih wyakti ring pekahyunan ida sang hyang indra.
    
     
    PUPUH SEMARANDANA
    
    
     
    
     
22. DEWA INDRA MENGHAYUNIN
    Riantukan wenten meraga satru sane jaga pacang ngebug jagat swarga, raris ida bhatara indra mengahyunin ring indike punika
23. MANGELARANG EKA NAYA
    Maring pekahyunan ida sang hyang indra metu eka naya sane kalintang mautama
24. EKA NAYA SANE SINGID
    Inggih…inggih…munggwing naya sane kabuatang olih ida bhatara indra saywakti singid pisan
25. MANGDA KASOR I RAKSASA
    Eka naya sane karencanayang wantah pemargi sane jaga keangge ngasorang satru sane meraga raksasa inggih punika niwatakawaca
26. RARIS IDA MENGHAYUNAN
    Ring sampune mepekahyunan, raris ida polih pemargi sane jaga kaambil kaangge ngasorang I satru
27. PACANG MANUNASAN WANTU
    Dawning ida rumasa nenten presida antuk nandingin iraksasa, ida raris jaga ngrereh wantuan
28. MARING MANUSA UTAMA
    Sane jaga katunasang wantu inggih punika ring sang maraga manusa sane mautama
    
     
    
     
    PUPUH GINANTI
    
    
     
    
     
29. ULENG IDA RING PAKAHYUN
    Inggih sane mangkin ida bhatara indra malih mepekahyunan
30. NIMBANGANG SANE KAJUDI
    Sane kekahyunin olih ida bhatara inggih punika nimbangan ring arsan ida
31. RING SEHANANIN MANUSA
    Ida nunggalang adnyana, ngruruh ring sehananin jatma sane pacang katunasan wantu
32. SANE UTAMA TUR SAKTI
    Saywakti, munggwing manusa sane jaga katunasang wantu wantah manusa sane mautama turmaning sakti
33. PACANG PRESIDA NGASORANG
    Wantah jatmane sane mabudi utama, wruh ring sehananin aji peperangan sane pacang presida ngasorang sang meraga daitya punika
34. IPUN IRAKSASA WYAKTI
    Manusa utama punika wyakti jaga presida ngemademang iraksasa.
    
     
    PUPUH GINANTI
    
    
     
35. SANE KATUNASANG TULUNG
    Inggih,, ring sampune ida sang hyang bhatara indra mepikahyun, raris ida ngemolihang pemargi minakadi manusa utama sane jage
    katunasang wantu
    
36. MARING PUTRAN PANDU WYAKTI
    Munggwing manusa utama turin mawisesa sane katunasang wantu wantah ja ring putran sang prabhu Pandu.
37. SANG ARJUNA MUNGGWING WASTA
    Kewentenang putran ida sang prabhu Pandu inggih punika mapesengan Sang Arjuna
38. SOLAH IDA SADU BUDI
    Ida sang arjuna yening rerehang ring parisolah wyakti parilaksanan ida sadhu budi
39. MANGKIN IDA NANGUN TAPA
    Kewentenan ida sang arjuna sane pinaka putran pandu punika kantun nangun tapa sane mautama
40. NUNGGALANG KAHYUNE SUCI
    Ring sehananin nangunan tapa punika kedasarin antuk pekahyunan idane sane nunggal
    
     
    PUPUH PUCUNG
    
    
     
    
     
41. MARING GUNUNG,
42. INDRAKILA SANE LUHUR
    Caritayang titian mangkin kewentenan ring gunung indrakila sane dahating mautama
43. ARJUNA METAPA
    Irika ring gunung indrakila pinaka genah ida sang arjuna nangun tapa semadi
44. PAGEH RING KAHYUNE SUCI
    Rikalaning ida sang arjuna nangun tapa wantah madulur antuk pekahyunan sane pageh turin suci
45. SAMPUN MANUT
    Sampun wyakti kocapang manut
46. RING TATA CARA MEYASA
    Manut ring sehananin tata titi nangunan tapa suci sane mautama
    
     
    PUPUH PUCUNG
    
    
     
47. SAPUNIKU,
48. MADULUR ANTUK PIKAHYUN
    Inggih…asapunika buat parilaksanan ida sang arjuna ritatkala nangun tapa, kadulurin antuk pikahyunan idane punika
49. SANE NENTEN OBAH
    Pikahyunan ida putran pandu sane nyomanan punika nenten ja
    obah ring sajeroning nangun tapa
50. ULENG NGASTAWA HYANG KAWI
    Ida sang arjuna nangun tapa, wyakti uleng pekahyunan idane ngastawa ida sang hyang parama kawi
51. SAMPUN PATUT
    Sampun kocapang manut ring kedharman
52. RING GAGELAR METAPA.
    Ngelarang sane kabaosang tapa yoga semadhi
    
     
    PUPUH DURMA
    
    
     
53. SANG HYANG INDRA
54. SANE MANGKIN CARITAYANG
    Inggih..sane mangkin jaga caritayang titiang buat kewentenan ida sang
    bhatara indra maring swarga loka
55. MAPIKAHYUN PACANG NGUJI
    Ring sampune ida polih manusa utama sane kajudi, ida malih mapikahyun pacang nguji
56. ANGGAN SANG ARJUNA
    Ida bhatara indra jaga nguji kawentenan anggan ida sang arjuna sane nangun tapa punika
57. MANGDA SIDA KAUNINGAN
    Munggwing tatujon ida sang bhatara indra nguji sang arjuna tetuweknyane mangda presida kauningan antuk ida
58. KEPAGEHAN MARING HATI
    Sumangdene pastika kauningan buat kepagehan pikahyunan ida sang arjuna
59. MAKA CIHNANNYA
60. MANUSA UTAMA WYAKTI.
    Duaning kepagehang maring hati wantah pinaka ciri sane nyihnayang patut kebaos manusa sane mautama
    
     
    PUPUH DURMA
    
    
     
61. TILOTAMA
62. MAKA MIWAH NI SUPRABHA
    Inggih..inggih.. kacarita wenten kocapang sang meraga istri maka kalih sane mapesengan Tilotama miwah Ni Supraba
63. WIDYADARI KATITAHIN
    Maka kalih anak istri punika nenten ja wenten tios meperagayang widyadari sane karuntuhang titah olih ida sang hyang indra
64. MANGDA SIDA NGODA
    Munggwing titah sane katiba ring widyadari maka kalih punika, inggih punika mangda presida maparisolah ngoda
65. PETAPANE SANG ARJUNA
    Sane pacang kagoda olih widyadari tilotama miwah ni supraba wantah kewentenan sang arjuna sane nangun tapa
66. ANTUK WARNI SANE LUIH
    Sane pacang keangge ngoda ida sang arjuna nenten wenten tios kewentanan paras sang widyadari maka kalih sane kalintang listuayu punika
67. MANGDANE SIDA
68. SANG ARJUNA KETANGININ
    Pengaptin ida mangda presida ngobah buat uleng pekahyunan sang arjuna nangun tapa, tur presida raris metangi.
    
    PUPUH GINADA
    
    
    
69. NGIRING MANGKIN CARITAYANG
    Inggih ida dane pamiarsa,, ngiring mangkin lantur caritayang
70. PARIDABDAB WIDYADARI
    Sane caritayang titiang mangkin, buat kewentenan paridabdab tilotama
    maka miwah ni supraba widyadari maring swargi
71. RIKALANING PACANG NGODA
    Ritatkala widyadari maka kalih jaga pacang ngelaksanayang sapetitah sang hyang indra inggih punika ngoda sang arjuna
72. SANG ARJUNA MARING GUNUNG
    Ngoda kewentenan sang pandu suta sane nyomanan nangun tapa ring gunung indrakila
73. SANE KANTUN NANGUN TAPA
    Ring gununge punika sang arjuna nangun tapa semadhi antuk pekahyunan sane pageh
74. WIDYADARI
75. MABUSANA NE UTAMA
    Pidadab widyadari maka kalih sampun ngentosin busana antuk busana sane mautama pisan
    
     
    PUPUH GINADA
    
    
     
    
     
76. MADULUR ANTUK ASMARA
    Kedulurin raris antuk pekahyunan widyadari maka kalih sane kaliput antuk semara
77. SANE TUMBUH MARING HATI
    Maduluran semara sane metu maring hati
78. NILOTAMA LAN SUPRABA
    Kewentenan widyadari maka kalih inggih punika tilotama miwah ni supraba duk punika
79. SAMPUN KEBAYANG RING KAHYUN
    Rikalaning punika, widyadari maka kalih sampun mgerawatang ring pekahyunan
80. BUAT PARAS SANG ARJUNA
    Sane merawat-rawat ring pekahyunan I widyadari maka kalih nenten wenten tion kewentenan warnin ida sang arjuna
81. NGODA HATI
82. WIDYADARINE KASMARAN
    Saywakti warnin sang arjuna sane bagus punika jeg sahasa ngoda hati mahawinan tilotama miwah ni supraba kasmaran ring pekarsan
    
     
    PUPUH PUCUNG
    
    
     
    
     
83. MARING GUNUNG
    Caritayang sane mangkin kewentenan ring gunung indrakila
84. WIDYADARI SAMPUN RAUH
    Irika sampun kocap rauh I widyadari maka kalih punika
85. NGODA SANG ARJUNA
    Ring sampune rauh maring gunung indrakila, digelis raris widyadari
    maka kalih ngoda buat kewentenan sang arjuna sane nangun tapa
86. ANTUK PARAS SANE MANIS
    Tilotama miwah ni supraba, ngoda sang arjuna wantah mesrana antuk paras sane kalintang jegeg
87. TUTUR AYU
    Turmaning tutur ayu sane presida ngerasuk ring hati
88. ANGGE NGUSIK SANG ARJUNA
    Punika kaangge serana ngoda sang arjuna.
    
     
    PUPUH PUCUNG
    
    
     
    
     
89. SAPUNIKU
90. WIDYADARI MARING GUNUNG
    Inggih..inggih.. asapunika buat parilaksanan widyadari maka kalih maring gunung indrakila punika
91. NGLAKSANAYANG NAYA
    Ngemargiang buat naya sandi sane katitah olih ida bhatara indra
92. MANGDA ARJUNA MATANGI
    Pengaptin idane mangda presida sang arjuna obah tur metangi
    saking tapa sane kemargiang
93. TANPA SAHUR
94. ARJUNA PAGEH RING TAPA
    Sakemaon sang arjuna nenten nyawis tur pageh ring pekahyunan nangun tapa
    
     
    PUPUH DURMA
    
    
     
95. TILOTAMA
96. LAN SUPRABA YA KUCIWA
    Dawning asapunika buat kepagehang sang arjuna nangun tapa ten presida ke goda, mehawinan I widyadari maka kalih kuciwa ring pekahyunan
97. KE SWARGA LOKA MEWALI
    Duaning ten presida ngoda sang arjuna, raris tilotama maka miwah ni supraba mewali raris ke jagat swarga
98. TANGKIL RING HYANG INDRA
    Widyadari maka kalih mewali ke swarga jaga menangkil ring ajeng ida sang bhatara indra
99. MANGUBAKTI MARING IDA
    Ring sampune nampek ring linggih ida bhatara indra, tilotama miwah ni supraba mengaturang sembah bhakti majeng ring ida bhatara indra
100. SAHA MANGATURANG SISIP
     Tumuli raris widyadari maka kalih ngelungsur pengampura
101. NENTEN SIDA
102. NGLAKSANAYANG TITAH SUCI
     Widyadari maka kalih mengaturang sisip sangkaning nenten presida ngemargiang titah suci sane karuntuhang olih ida bhatara indra
     
      
     PUPUH DURMA
     
103. DEWA INDRA
104. MAKA MIWAH DEWA SWARGA
     Ring sampune wenten atur widyadari maka kalih kadi punika, raris ida bhatara indra miwah para dewa sane wenten ring swarga duk punika, inggih sapunapi ?
105. BAHAGIA MIRENG ORTI
     Nungkalik minakadi kewentenan pekahyunan ida bhatara, mesriak galang, rasa bagia ngeliput ring arsan ida bhatara sami.
106. INDIK SANG ARJUNA
     Sane mehawinan kadi asapunika, duaning pastika sampun ring kewentenan ida sang arjuna uleng nangun tapa
107. NENTEN OBAH MARING TAPA
     Ida sang arjuna nenten madue pekahyunan sane linglung utawi obah ritatkala ngastawa hyang kawi antuk tapa
108. MAPEKAHYUN SANE TUNGGIL
     Ida sang arjuna sane kajudi olih ida hyang bhatara indra wyakti madrue pekahyunan sane tunggal
109. MAKA CIHNA
110. MANUSA SANE UTAMA
     Pekahyunan ida sang arjuna sane uleng, punika pinaka ciri, sane nyihnayang ida sang arjuna patut kaucapang manusa sane mautama.
     
     
     PUPUH MASKUMAMBANG
     
      
     
      
111. SANG HYANG INDRA
     Kacarita sane mangkin ida sang hyang indra
112. SUMANDANGSAYA RING HATI
     Metu raris ring arsan ida, pekahyunan sane bimbang ring kewentenan ida sang arjuna.
113. NGANGKENANG ARJUNA
     Ida bhatara indra mengangkenang buat tetuek sang arjuna nangun tapa
114. NGREREH BAHAGIA PEDIDI
     Hyang indra ngangkenang tetujon sang arjuna nangun tapa wantah kaangge ngrereh keliangan ring anggane kemanten
115. RIKALANE NANGUN TAPA
     Ngereh keliangan sane kaanggen dasar olih sang arjuna nangun tapa
     
     PUPUH MASKUMAMBANG
     
      
     
      
116. RARIS IDA
117. MEMARGI KE GUNUNG SUCI
     Duaning asapunika buat kewentenan ring pekahyunan, digelis raris ida bhatara indra memargi ke gunung indrakila genah sang arjuna nangun tapa
118. NAMPEKIN ARJUNA
     Ring sampune rauh ring gunung indra kila raris sang arjuna ketampekin
119. NAKENANG KEBET RING HATI
     Munggwing sepengrawuh ida hyang indra jaga pacang nakenan pekebet sane wenten ring pekahyunan
120. INDIK ARJUNA METAPA
     Sumangdene pastika kauningang buat tetujon sang arjuna nangun tapa
     
     
     PUPUH GINANTI
     
      
121. ANTUK BUSANA SANG WIKU
     Rikala punika, ida hyang indra ngangge busana kadi busanan sang pandita sane utama
122. SANG HYANG INDRA NYALIN WARNI
     Punika kaanggen magentosang rupa olih ida sang hyang indra
123. MENAKENIN SANG ARJUNA
     Irika raris ida hyang indra ngawit metaken ring ida sang arjuna
124. BAWOS IDA ALUS MANIS
     Tatkala ngruntuhang petaken ring sang arjuna, wyakti bawos ida sang haying indra alus tur manis
125. UDUH CENING SANG ARJUNA
     "uduh..cening sang arjuna putran pandu ne utama idewa "
126. BAPA METAKON NE MANGKIN
     "Dong cingakin buat sepengrawuh bapa ne jani,.ne jani ade ane lakar takonang bapa kapining idewa.."
     
     
     PUPUH GINANTI
     
      
127. CENING BAGUS PUTRAN PANDU
     "cening..cening bagus sang arjuna putran padu ne nyomanan idewa"
128. KSATRIA NE SUJATI
     "…Sumeken saja idewa meraga ksatria ne luih mautama.."
129. NAPI TATUJON IDEWA
     "..ane sarat takonang bapa ne jani,,to sing ada len buat tatujon idewa ne jani.."
130. NANGUN TAPA SANE LUIH
     "..buat tetujon idewane nangun tapa sane sarat uningang bapa.."
131. TUR IDEWA TELEB PISAN
     "..ken ke ane ngeranayang bapa sarat metakon kapining idewa?, duaning idewa cingakin bapa teleb tur uleng pisan nangun tapa.."
132. NENTEN OBAH MARING HATI
     " turmaning idewa tusing taen obah disajeroning kahyun idewa.."
     
     PUPUH GINADA
     
      
133. WUS HYANG INDRA MAWECANA
     Ring sampune puput ida hyang indra mawecana kadi asapunika
134. SANG ARJUNA RARIS NYAWIS
     Raris digelis kecawis olih ida sang arjuna
135. ANTUK BAWOS ALUS BANBAN
     Ida sang arjuna nyawis wecanan hyang indra antuk bawos sane plapan alus
136. "INGGIH RATU MRAGA WIKU
     "singgih ratu sang meraga pandita iratu..
137. SANGKANING TITIANG METAPA
     Tityang nyawis sapetaken ratu pandita, buat tetujon titiange ngelaksanayang tapa
138. KADI MANGKIN
     Tityang ngelaksanayang tapa ritepengan puniki
139. MANGDA IRATU PAWIKAN
     Nika jaga atur uningayang titian mangda iratu presida uning
     
     
     PUPUH GINADA
     
      
140. TATUJON TITYANG METAPA
     Singgih ratu sang pandita, munggwing pengapti ri sajeroning titian nangun tapa kadi mangkin
141. MARING GUNUNGE PUNIKI
     Tityang nangun tapa iriki ring gunung indrakila
142. TITYANG NGEMARGIANG DHARMA
     Sane dados unteng pengaptin tityang ten wenten lian, tityang wantah ngemargiang swadarma
143. DHARMANING SATRIA LUHUR
     Tityang puniki ngemargiang swadarma dados ksatria sane kasengguh mautama
144. MANGDANE SIDA MAGUNA
     Sumangdene presida tityang dados jatma ne maguna
145. POLIH SANTI
     Ngemolihang kerahajengan
146. SAJERONING KAHURIPAN
     Punika sane keaptiang titiang risajeroning maurip ring jagat puniki
     
     
     PUPUH GINADA
     
      
147. PENGAPTIN TITYANG METAPA
     Tiyos ring punika, pengaptin titiang nangunang tapa sane mangkin puniki
148. MANGDA SIDA DADOS SAKTI
     Mangdane presida tityang ngemolihang sane kewastanin aji kawruhan
149. ANGGEN NGUWANTU I RAKA
     Tetuwek titiang ngerereh aji kawruhan punika, jaga pacang anggen tityang ngewantu belin titiang, ratu
150. SANG YUDISTIRA KASENGGUH
     Belin tityang punika mapesengan Sang Yudistira
151. PRESIDA NGAMBIL NEGARA
     Tityang jaga ngwantu belin tityang punika mangda presida ngambil panegaran ida
152. SANE NGUNI
153. KAREBUT SANG DURYODANA
     Mangda presida ngambil panegaran tityang sane dumun sampun karebut olih sang duryodana
     PUPUH GINADA
     
      
154. YEN PRESIDA ANTUK TITYANG
     Singgih ratu, yening sampun presida dewek tityange punika
155. NGEMOLIHANG SWECAN WIDHI
     Presida tityang ngemolihang waranugrahan ida hyang prama wisesa
156. PASTIKA TITYANG PRESIDA
     Rikala punika, pastika sampun pacang presida antuk tityang
157. PACANG NGWANTU NGEREBUT
     Tityang pacang presida ngwantu belin tityang ida sang yudistira mewali ngambil utawi ngerebut
158. NE KEJAJAH DURYODANA
     Tityang sareng sameton tityang panca pandawa, jaga ngerebut malih panegaran tityang sane sampun kaambil olih
     sang duryodana
159. MANGDA TREPTI
     Pengaptin tityang ngelaksanayang naya kadi asapunika mang
     presida ajeg
160. NEMU SANTI JAGAT PADA"
     Presida raris jagate sami ngemolihang kerta raharja"
     
     
     PUPUH SEMARANDANA
     
      
161. SAPUPUT ARJUNA NYAWIS
     Inggih ring sampune puput kadi asapunika buat penyawis sang arjuna
162. SAPETAKEN SANG HYANG INDRA
     Menyawisin munggwing petaken ida bhatara indra
163. MEWASTU HYANG INDRA SUKA
     Kagiat raris ida hyang indra gargita naring kahyun
164. MIRENG ATUR SANG ARJUNA
     Gargitan kahyun ida hyang indra sangkaning miragi buat penyawis sang arjuna
165. NANGUN TAPA MANGDA SIDA
     Mecihna sampun munggwing pengaptin sang arjuna nangun tapa
166. NGARDI JAGATE RAHAYU
     Munggwing tatujon sang arjuna nangun tapa punika wantah ngardiang jagate kerta raharja
167. LEPAS SAKING KASENGSARAN
     Tur presida jagate nenten keni kasengsaran
     PUPUH SEMARANDANA
     
      
168. KAGIAT ARJUNA NGAKSI
     Irika raris ida sang arjuna kagiat menyingak
169. SANG PANDITA MESEH RUPA
     Sane mahawinan kadi asapunika, duaning sang mraga wiku punika sampun mesalin warni
170. MEWALI DADOS HYANG INDRA
     Warnin sang pandita punika mewali kejati mula, inggih punika maperagayang ida bhatara indra
171. SANG ARJUNA MATUR SEMBAH
     Irika raris ida sang arjuna mengaturang sembah bhakti ring hyang indra
172. NGATURANG GARGITAN MANAH
     Ida sang arjuna mengaturang penama bagian manah ring ida
173. RARIS HYANG INDRA SUMAHUR
     Ida hyang bhatara indra raris ngruntuhang pawecana
174. ANTUK BAWOS ALUS BANBAN
     Wecanan ida hyang indra ring sang arjuna wantah plapan alus
     
     
     PUPUH SINOM
175. "CENING BAGUS SANG ARJUNA
     "..cening-cening bagus putran pandu, sang arjuna I dewa
176. PUTRAN PANDU KAPING TRINI
     Idewa pinaka putran prabu pandu ne nyomanan
177. NIRA MERASA GARGITA
     Apang idewa uning, ne jani nira merasa gargita pisan
178. NGAKSI CENING ANE JANI
     Suba nyen nira presida ngaksi idewa ane jani
179. MEPEKAHYUN SANE SUCI
     Suba tatas nyen baan nira, mula saja idewa maduwe pepineh ane sujati suci
180. MENANGUNANG TAPA LUHUR
     Tatkala idewa nangunang tapa ne mautama dini di gunung indrakila
181. ANTUK KAHYUN NENTEN OBAH
     Idewa nangun tapa medasar baan pekahyunansane pageh
182. KAHYUN I DEWANE TUNGGIL
     Pekahyunan idewa mula sujati nunggil
183. SAMPUN PATUT
184. KASENGGUHANG WONG UTAMA
     Sangkaning idewa presida nangun tapa antuk pekahyunan uleng, patut saja kasengguh manusa mautama
     PUPUH SINOM
185. JANI NIRA NGICEN PICA
     Nah ane jani nira lakar micayang idewa waranugraha
186. GATRA SANE MAUTAMI
     Ento sing ada len tuah gatra sane mautama
187. MANGDA IDEWA MIARSA
     Ento nyen ane lakar pidartayang nira kapining idewa, apang idewa presida mirengang
188. NE GATRA PAWISIK SUCI
     Patut idewa uning, ni tuah pawisik ane suci lan singid
189. SAKING SANG HYANG PRAMA KAWI
     Gatra ane suci ene tuah mawit saking ida hyang kawi
190. SANG HYANG SIWA SANE LUHUR
     Mawit saking hyang widhi sane maperagayang sang hyang
     siwa
191. LEDANG IDA RING IDEWA
     Jani nira ngewisikin idewa apang idewa tusing sebet,
     kasujatiane ida hyang siwa wyakti asung kapining idewa
192. MICAYANG SANE KAAPTI
     Ida hyang siwa suci presida lakar ngisinin pengaptin idewa ne
193. REH PUNIKA
194. LANTURANG TAPAN IDEWA"
     Tuah keto ane dartayang nira teken idewa apange idewa tetep nglanturang petapan idewane…."
     
     
     PUPUH PANGKUR
     
      
195. SANE MANGKIN KACARITA
     Inggih.. sane mangkin jaga lantur caritayang titiang
196. KAWENTENANG NIWATAKAWACA BRANGTI
     Sane uningayang tityang mangkin buat kewentenan iraksasa niwatakawaca sane kalintang duka
197. SAMPUN WYAKTI MIRENG IPUN
     Iraksasa brangti pisan risampun miragi orti
198. PARIINDIK SANG ARJUNA
     Orti sane sampun kapiragi ten lian buat kewentenang ida sang arjuna
199. NANGUN TAPA MAUTAMA MARING GUNUNG
     Sampun wyakti kapiragiyang, kewentenang ida sang arjuna nangunang tapa suci
200. IRAKSASA NGUTUS WADWA
     Sangkaning brangti, raris iraksasa niwatakawaca ngutus wadwa
201. RAKSASA MERAGA BAWI
     Munggwing wadwa sane kautus inggih punika maparagayang bawi alas
     PUPUH PANGKUR
     
      
202. RARIS BAWI KATITAHANG
     Irika raris raksasa sane marupa bawi punika karuntuhang titah
203. NGERUSAK WANA SANE WENTEN RING GIRI
     Indik titah sane ketiba ring ibawi, mangda presida ngusak asik wana sane wenten ring sehananin gunung indrakila
204. ARJUNA RARIS TENGKEJUT
     Kacarita raris, ring sampune wenten byuta kadi asapunika,mengawinang ida sang arjuna dahat tengkejut
205. METANGI MAKTA SENJATA
     Raris metu duka ring pekahyunan ida sang arjuna saha metangi makta senjata
206. KABENTANGIN RARIS PANAH MARING SATRU
     Senjata marupa panah raris kabentangin nyasar I bawi
207. DAWEG PUNIKA HYANG SIWA
     Ring galahe punika, kacarita kewentenang ida sang hyang siwa
208. SAMPUN TEDUN MARING GIRI
     Ida hyang siwa suci tedun ring gunung indrakila punika
     
     
     PUPUH PANGKUR
209. JAGA NYINGAK SANG ARJUNA
     Buat tetujon ida tedun ring gunung, wantah jaga pacang nyingak ida sang arjuna
210. SAMPUN SIDA NANGUN TAPA SANE SUCI
     Duaning ida sang arjuna sampun presida ngelaksanayang tapa sane mautama
211. SANG HYANG SIWA LEDANG RAWUH
     Buat keulengan pekahyunan sang arjuna metapa, ngawi ledang ida hyang siwa ngerauhin
212. JURU BOROS ANGGAN IDA
     Ida hyang bhatara sida tedun maperagayang sekadi juru boros
213. NE MAWIT SAKING SUKU KIRATA TUHU
     Munggwing rupan juru borose punika, wyakti sekadi manusa sane mawit sang silih sinunggil suku kirata
214. TALER NGEMENTANGANG PANAH
     Daweg punika, suku kirata sane pinaka lawat hyang siwa taler ngementangin panah sane kabinawa
215. SINARENGAN KALEPASIN
     Tumuli raris ring galahe punika, ida hyang siwa sinarengan sareng sang arjuna ngelepasin panah
     PUPUH DURMA
     
      
216. PANAH MLESAT
217. RARIS NANCEB BAWI ALAS
     Wyakti kabinawa pisan, panahe punika melesat nyujur ibawi tur raris nunjebin I celeng alas punika
218. NGAWINANG I BAWI MATI
     Irika raris, ibawi punika digelis padem
219. PANAHE MANUNGGAL
     Ri sampune ibawi mati, raris irika panah sang arjuna lan hyang siwa dados siki
220. PANAH ARJUNA LAN SIWA
     Panah sang arjuna manunggal sareng panah bhatara siwa
221. NGAWINANG BINGUNG RARIS
     Kewentenan panahe dados siki punika, mawinan ida sang arjuna miwah sang hyang siwa sane maperagayang wong kirata raris bingung
222. SIRA PUNIKA
223. SAMPUN MADEMANG I BAWI
     Bingung antuk nguningayang, sapasira ke menawi sampun presida ngemademang I bawi punika
     
     
     PUPUH DURMA
     
      
224. SANG ARJUNA
225. MAYUDA NGLAWAN HYANG SIWA
     Kewentenan indike kadi asapunika mehawinan raris merebat sang arjuna ngelawan wong kirata punika
226. SALING PANAH IDA RARIS
     Payudane ngangsan ngagengang, sang mayuda raris saling panah
227. WONG KIRATA KALAH
     Duk payudan punika, wong kirata kasor
228. ELUNG PANAH SANG HYANG SIWA
     Irika panah ida hyang siwa ka elung olih sang arjuna
229. PESIATE MAKA KALIH
     Raris payudane sang arjuna sareng wong kirata kelanturang malih
230. TANPA SENJATA
231. SANG ARJUNA KASOR RARIS
     Munggwing kewentenang payudane punika, maka kalih nenten mesrana senjata, irika sang arjuna kasor
     PUPUH GINANTI
     
      
232. RISAMPUN ARJUNA LABUH
     duk punika sang arjuna labuh ring ajeng bhatara siwa sane maperagayang wong kirata
233. MENAANANG RASA SAKIT
     Wyakti aduh..aduh..ida sang arjuna menaanang rasa sakit
234. RARIS NGAMBEL COKOR SIWA
     Antuk naya wiweka raris sang arjuna presida ngambil cokor wong kirata jaga kapantigan
235. KIRATA MESALIN WARNI
     Sakemawon, wawu pacang kapantigan, wong kirata punika raris meseh rupa
236. MEWALI DADOS HYANG SIWA
     Wong kirata punika, mesalin rupa mewali dados sang hyang siwa suci
237. ARDANARESWARA LUIH
     Ritatkala punika, ida sang hyang siwa maperagayang sang hyang ardanareswari
     
     
     PUPUH GINANTI
     
      
238. ARDANARESWARA IKU
     Munggwing kewentanang ardanareswari punika
239. LANANG WADON DADOS TUNGGIL
     Kewentenang ardanareswara punika wantah maperagayang lanang nunggil sareng istri
240. MELINGGIH RING DUUR PADMA
     Munggwing palinggihan ida maring duur sekar padma
241. ARJUNA RARIS MAMUJI
     Ngaksi kawentenang wong kirata dados hyang siwa, raris ida sang arjuna ngaturang sembah bhakti tur mamuji
242. SANG HYANG SIWA NGELEDANGANG
     Raris sang hyang siwa ledang ring sembah hyang arjuna
243. DUANING ARJUNA SUCI
     Keledangan hyang siwa sangkaning kaulengan sang arjuna metapa.
     
     
     PUPUH DURMA
     
      
244. SANG HYANG SIWA
     Ritepengan punika kacarita raris ida hyang siwa, inggih sapunapi ?
245. ASUNG MICAYANG NUGRAHA
     Ida sang hyang siwa, ledang micayang waranugraha kapining sang arjuna
246. MAPAICA PANAH SAKTI
     Keledangan kahyun ida hyang siwa inggih punika mapaica panah sane sakti
247. PANAH MADURGAMA
     Panah sane kapaica punika dahating madurgama pisan
248. PASUPATI IKANG NAMA
     Panahe sane kapaica punika kasengguhang panah pasupati
249. TUR KAICEN SASTRA AJI
     Tiosan ring panah, taler kaicen ajahan sastra suci
250. MADAGING MANTRA
     Sastra punika madading mantra
251. MANTRA SUCI TURIN SINGID
     Mantra sane kapica wyakti singid turmaning mautama pisan.
     
     
     PUPUH DURMA
     
      
252. SAPUNIKA
253. SAMPUN SIDA KAHATURANG
     Inggih pamiarsa,,wantah kadi asapunika presida antuk tityang mengaturang
254. CERITA SANE UTAMI
     Presida tityang nembangang wyadin ngartos geguritan sane keambil saking kakawin arjuna wiwaha
255. YENING WENTEN IWANG
     Yening prade wenten iwang tityang kadi mangkin
256. RITATKALA MENGATURANG
     Iwang tityang tatkala mengaturang geguritan puniki
257. GITA PANAH PASUPATI
     Ritatkala tityang ngaturang gegurtian sane memurda panah pasupati puniki
258. NUNAS AMPURA
     Tityang nunas geng rna sinampura
259. SINEB ANTUK PRAMA SANTIH.
     Inggih..pinaka pemuput, sineb tityang antuk parama santih "Om Santih Santih Santih Om"
     
      
     
     
      
     
     DAFTAR PUSTAKA
     
      

• Dinas Pendidikan Dasar Propinsi Daerah Tingkat 1 Bali.1990. Arjuna Wiwaha. Cetakan Kaping 2.
  
   

Suweta, I Made. 2008. Bahasa Kawi III (Pengantar Apresiasi Kesusastraan Kawi/Jawa Kuno). Fakultas Dharma Acarya IHDN Denpasar